ԸՆԿԵՐԱԿԱՆ ԽԱՆԴԻ ՎՆԱՍԱԿԱՐՈՒԹՅԱՆ ԵՎ ՇՓՄԱՆ ՄԵՋ ԸՆԴԼԱՅՆՎԵԼՈՒ ԿԱՐԵՎՈՐՈՒԹՅԱՆ ՄԱՍԻՆ

Աշոտ Թորոսյան

            Մենք բոլորս սոցիալական արարածներ ենք և կարիք ունենք շփման։ Սակայն, որոշակի պատճառների բերումով, շատերի մոտ չի ստացվում ուրիշների հետ լիարժեք շփում ապահովել և ընդլայնել ընկերների շրջանակը։ Տողերիս հեղինակի դիտարկումներով, շփման մեջ ընդլայվելուն խոչնդոտող ամենից հաճախ հանդիպող պատճառներից մեկը ընկերության ոչ համարժեք ըմբռնումն է։ Մասնավորապես, լայնորեն տարածված է նախապաշարմունքը, համաձայն որի՝ իսկական ընկերը միայն մեկը կարող է լինել։ Դա բերում է նրան, որ երբ ընդլայնվելու, նոր ծանոթություններ ձեռք բերելու իրավիճակներ են ստեղծվում, ոմանց մոտ այնպիսի զգացում է առաջանում, որ իրենց կյանք նոր մարդկանց ներս թողնելով, իրենք, այդպիսով, դավաճանում են մտերիմ ընկերոջը։ Եթե վերջինս էլ, իր հերթին, նկատելով, ընկերոջ շուրջը գտնվող նոր մարդկանց, սկսում է խանդի նոպաներ դրսևորել, ապա խնդիրներն անխուսափելի են։ Այն, թե ինչու են ընկերությունը պատուհաս դառնում երկու մարդկանց համար, խոսում է նրանց ոչ բավարար հասուն լինելու և ներքին խնդիրների մասին։ Միթե՞ ընկերությունն այնպիսի հարաբերություն է, որը պետք է գրանցել ՔԿԱԳ բաժնում։ Գուցե հարկ լինի մտերմությունը հանրությանն ի ցույց դնող արարողությու՞ն կազմակերպել, որպեսզի դրա մասին հանդիսավոր կերպով հայտարարվի բոլորին և ոչ ոք երբևէ հանդգնություն չունենա՝ հայտնվելու իրենց արանքում:

Իսկական մտերմությունը երբեք չի ընդգծվում։ Չկան մարդիկ, որոնց կարելի է քիչ և շատ սիրել։ Կա անհատականացված վերաբերմունքի ողջամիտ սկզբունք, որը կառուցվում է տվյալ մարդու անհատականության համարժեք ընկալման վրա։ Շփման մեջ սահմաններն այստեղ շատ ճկուն են և դինամիկ։ Այդ սկզբունքի հիման վրա կայացած հարաբերությունները հարստացնում են մարդու սոցիալական փորձը, շփման հմտությունները, ստեղծում բարենպաստ մթնոլորտ աշխատանքային կոլեկտիվում, խթանում թիմային ոգին հնարավորություն տալիս խմբի անդամներին ազատորեն և անկաշկանդ ինքնադրսևորվելու, ինքնաիրացման։ Այն խմբերում, որոնց անդամները միտված են իրենց շփումների շրջանակն ընդլայնելուն, քիչ են հանդիպում կոնֆլիկտներ, տարաձայնություններ, պառակտումներ, «թայֆայացման» միտումներ, իսկ եթե, ինչ-որ հարցերի հետ կապված անհամաձայնություններ են ծագում, ապա, շնորհիվ յուրաքանչյուրի անձնային հասունության, հաջողությամբ քննարկվում են ու հաղթահարվում։ Ստորև բերված են մի շարք կետեր, որոնք կիրառելու դեպքում, կարելի է շփումների և կապերի ընդլայնման մեջ դրական արդյունքներ ակնկալել։

• Անկեղծ հետաքրքրվածություն հանդես բեր՝ առանց խառնվելու դիմացինի անձնական կյանքին։ Հարգիր դիմացինի տարածությունը։
• Խուսափիր անընդհատ միևնույն մարդու հետ ընդմիջման դուրս գալուց։ Դա հասուն չէ և խոսում է աննորմալ կապվածության նախադրյալների մասին։ Եթե հնարավորություն կա աշխատասենյակում տարբեր տեղեր նստելու, ապա դա լավ է, քանի որ այդպես կարելի է հնարավորինս շատ մարդկանց հետ շփվել:
•  Ուշադիր եղիր գործընկերոջդ կարիքների նկատմամբ։ Եթե, օրինակ, գիտես, որ նա առողջական խնդիրների պատճառով այդ օրը աշխատանքի չի եկել, ապա կարող ես զանգ տալ և հետաքրքրվել նրա վիճակով։ Անհրաժեշտության դեպքում առաջարկիր օգնությունդ։
• Ինքդ ստեղծիր կամ մի մերժիր աշխատանքային առօրյայից դուրս համատեղ ժամանցի հնարավորությունը։
•  Մի սպասիր դիմացինի կողմից նախաքայլի։ Ինքդ դա արա։